UKA 2001 / 32
Peqqussutissatut siunnersuummut oqaaseqaatit
Nalinginnaasumik oqaaseqaatit
Piginneqatigiilluni inissiat pillugit Inatsisartut peqqussutaat massakkut atuuttoq 1991-imi atulersinneqarpoq, taassumalu tunngavigalugu piginneqatigiilluni inissialiortarneq pillugu peqqussut siulleq 1989-imeersoq. Piginneqatigiilluni inissiat inissialioriaatsitut nutaatut taamanikkut ilisaritinniarneqarsimapput akunnattumik isertitaqartartut isertittagaannut uuttuuttutut isigineqarlutik, aammalu ineqarnermut ileqqaagaqartarnissamut takutitsiniutaallutik.
Piginneqatigiilluni inissialiortarnermik aaqqissuussinerup aallartinneraniilli inissiat angissusissaat, pitsaassusissaat sananeqarnerminnilu akissaat killeqartitaajuaannarsimapput. Ineqarnermut tunngasutigut ingasaassisoqannginnissaa kiisalu inissianit attartortittakkanit pitsaanerusunik sanasoqartalinnginnissaa eqqarsaatigalugit pisortat annertuumik inissianut taarsigassarsisitsisarnerat / tapiissuteqartarnerat pissutigalugu taamaallaat periarfissaqarfigineqarsimavoq piginneqatigiilluni inissianut annerpaamik 105 kvadratmeteriusunut aammalu annerpaamik 15.500 kr.-inik kvadratmeterimut akilinnut tapiisoqartarnissaa.
Peqqussutissatut siunnersuummik saqqummiussineq Inatsisartunut ilaasortap Mikael Petersenip Inatsisartut upernaakkut ataatsimiinneranni 2001-imi siunnersuutigisaanik Inatsisartut oqallisiginnissimanerannut malittaavoq, tassa taassuma siunnersuutigisimammagu piginneqatigiilluni inissianik massakkumut angissuserititassaatitaasunik qaangiisimasunut sanasinnaalernissamut periarfissiisoqarnissaa. Peqqussutissatut siunnersuut piginneqatigiilluni inissiat pillugit Inatsisartut peqqussutaannik annertunerusumik nutarteriniarnissamut alloriarneruvoq siulleq. Nutarterinivissaq piginneqatigiilluni inissiat pillugit Inatsisartut peqqussutissaannik nutaamik inerneqarumaarpoq, naatsorsuutigineqarporlu taassuma Inatsisartut Ukiakkut 2002-imi ataatsimiinnissaannut saqqummiunneqarumaarnissaa.
Peqqussutissatut siunnersuut KANUKOKA-mut tusarniaassutigineqarsimavoq, siunnersuullu tassaanngaaniit uparuagassartaqartinneqarani, tassa kommuunit aningaasaleeqataassutigisartagaasa tulleriinnernut inissisimanerannik allanngortitsisussaanngimmat.
Peqqussutissatut siunnersuut allaffissornikkut aningaasatigulluunniit Namminersornerullutik Oqartussanut kommuuninullu sunniutissaqanngilaq.
Aalajangersakkanut ataasiakkaanut oqaaseqaatit
§ 1, nr. 1-imut
Aalajangersagaq § 1, nr. 2-p kingunerisaanik iluarsiineruvoq.
§ 1, nr. 2-mut
Aalajangersakkap erseqqissarpaa Naalakkersuisut kommunalbestyrelsillu inigisap angissusiata annerpaamik 105 kvadratmiiteria tikillugu tapiiffigisassagaat aammalu kvadratmiiterimut aki 15.000 kr.-niusoq annerpaamik tapiiffigisassallugu.
Aammattaaq aalajangersakkap imaraa piginneqatigiilluni inissiaatileqatigiit 105 kvadratmiiterinit anginerusunik sananissamik kissaateqartut, imaluunniit kvadratmiiterimut 15.000 kr.-ninit akisunerusunik piginneqatigiillutik inissialiorusuttut qaangiinernik nammineerlutik aningaasalersuisarnissaat.
Piginneqatigiilluni inissianik illutut imaluunniit illutut marloqiusatut sanasarnissamut piginnaatitsisarnissaq taamaallaat naatsorsuutigineqartarsinnaassaaq immikkut ittunik pisoqartillugu, tassa illut ataasiakkaat marloqiusallu sanaartorfissagissaanermut aningaasartornangaatsiartarmata taamatuttaarlu sananeqarnerat ingerlanneqarnerallu taamaaqataanik akisunerusarluni. Massakkumut taamaallaat akuersineqartarsimavoq nunap sananeqaataata isikkuatalu tamanna pisariaqartikkaangagu.
Piginneqatigiilluni inissiat inigineqarsinnaasortaattut pineqarput inissiami init tamakkerlutik. Toqqorsiviit/quit inissiap silaannartaata avataani inissisimasut ilaatinneqanngillat, kisiannili inissisimanerisa ilimanarsisippassuk oqorsarneqarsinnaanerat inigineqartunullu ilanngunneqarsinnaanerat tamanna allatut isigineqalersitsisinnaavoq. Piginneqatigiilluni inissiat ataasiakkaat inigineqarsinnaasortaat tunngavissat makku tunngavigalugit naatsorsorneqartassapput:
- Inissiat ataasiakkaat silatimikkut iigaasa avallersaasigut uuttuilluni naatsorsuineqartassaaq, imaluunniit qaliap silataa tungaanit, aammalu inissiat akunnequtaasa qeqqannit.
- Inissiap qaliata inigineqartussanngorlugu aaqqissuussimasortaa ilanngunneqassaaq.
- Illup isui inissiat akunnequtaasut affartut naatsorsuunneqassapput.
- Inigisami majuartarfiit ilanngunneqassapput quleriinni majuartarfittut atuuffigisaanni tamani.
- Naqqup atai ilanngunneqassapput inigisatut aaqqissuunneqarsimagunik.
Piginneqatigiilluni inissiat ataasiakkaat kvadratmiiterimut akii naatsorsorneqassapput inissiat sananeqarnerminni akii tamarmiusut kvadratmiiterit amerlassusiinik tamarmiusunik agguakkat tunngavigalugit.
Piginneqatigiilluni inissiaatileqatigiit inissiaataasa killiliussatut aalajangersagaasut qaangersimappatigik qaangiisimaneq aningaasalersuiffigineqarsinnaavoq Piginneqatigiilluni Inissiaatileqatigiiffiup taarsigassarsineratigut, taamaattoqassagaluarpallu taarsigassarsiat tulleriilluni inissisimanermi Naalakkersuisut kommunalbestyrelsillu taarsigassarsiarititaasa tammarnaveeqqusiivigineqarsimaneranni kingullinngorlutik inissisimassallutik, imaluunniit ilaasortat inissianik anginerusunik atuisussat immikkut akiliuteqartinneqarnerisigut.
§ 2-mut
Siunnersuutigineqarpoq allannguutissat 1. januar 2002-imi atuutsinneqalissasut. Peqatigitillugu ikaarsaariarnissamut aaqqissuussisoqarnissaa siunnersuutigineqarpoq, tassa piginneqatigiillutik inissiaatileqatigiinngorniat malittarisassat massakkut atuuttut malillugit taarsigassarsisinneqarnissamik neriorsorneqareersimasut toqqaasinnaanngortillugit nutaamik aaqqissuussinermut nuussinnaanissamut, tassa 105 kvadratmiiterinit anginerusumik inissialiornissartik kissaatigigunikku.